حوزہ نیوز ایجنسی کی رپورٹ کے مطابق، ننکانہ صاحب/ مجلس وحدت مسلمین کے زیر انتظام وار برٹن ضلع ننکانہ صاحب میں جشن مولود کعبہ کی مناسبت سے سیرتِ امام علی علیہ السلام امن کانفرنس کا انعقادکیا گیا ،اس کانفرنس میں ڈپٹی سیکرٹری جنرل ایم ڈبلیو ایم علامہ سید احمد اقبال رضوی نے خصوصی شرکت کی اور شرکاء سے خطاب کیا، اس کانفرنس میں شیعہ سنی علمائے کرام، اکابرین سمیت تمام مکاتب فکر کے عوام نے بھرپور شرکت کی ۔
علامہ سید احمد اقبال رضوی نےخطاب کرتے ہوئے کہاکہ سیرت امام علیؑ ہمہ جہتی پہلو رکھتی ہے ۔ مولائے کائنات کی شخصیت ہر طبقے سے تعلق رکھنے والے کیلئے مشعل راہ ہے ، امیر المومنین ؑ کی ذات با برکت میں ہمیں خدا کا سچا عبد ،ایک جانباز مجاہد، ایک بااخلاق شوہر، یتیموں کا سہارا، ایک کامیاب سیاست دان، ایک شفیق باپ دکھائی دیتا ہے ۔
انہوں نے کہاکہ رسول خدا ؐ کے بعد امت مسلمہ کے درمیان مرکز وحدت ہستی اگر کوئی ہے تو وہ امیر المومنین حضرت علیؑ ہیں۔ عالم اسلام کو درپیش تمام مشکلات اور مسائل کا حل سیرت علیؑ کی پیروی میں پنہاں ہے۔مسلمان آج تباہی کے دہانے کھڑے ہیں ، مغربی قوتیں اسلام کی شناخت کو مٹانے کی کوشش میں مصروف ہیں ۔
